Kongresaj kuriozaĵoj

Jen ĉi-tie vi trovos kelkajn kuriozaĵojn okazintajn dum la 85a Universala Kongreso. Se vi memorfiksis aliajn - sendu ilin al paĝprizorganto. Dankon!

• En la unua programtago aperis en la programtabelo la jena divido de salonoj, paralele:
  En salono Masĉler: komunistoj.
  En salono Dratwer: Rondo Kato.

  Josef Ŝemer, kiu konis persone tiujn du israelajn forpasintojn M. kaj D., rakontis kun rideto, ke ĝuste I. Dratwer ne ŝatis katojn, dum D-ro H. Masĉler ege amis ilin (kaj eĉ tenis kelkajn siahejme!), sed ege ne ŝatis la komunisman reĝimon: li eĉ verkis esperantlingvan anekdotan libreton pri tiu reĝimsistemo ("La necenzurita humuro").
  Sed la sorto diktis alie kaj komunistoj iris al M., dum katamantoj iris al Dratwer.

• Ses kuraĝuloj kandidatiĝis por la scikvizo, kiu estis fakte konkurso titolita "Kiu estos la ĉampiono de la kleruloj". La demandojn verkis J. Ŝemer, kiu ankaŭ gvidis la programeron dum 1.5 horoj. La temoj de la demandoj estis variaj, kiel ĝenerala kaj esperanta literaturoj, historio, biologio, geografio, religioj ktp. Fine de la unua stadio restis du el la ses konkurantoj: S-ino Heide Martha Heide Otto (Germanio-Albanio) kaj S-ro Giorgio Denti (Italio). Ĉi-lasta venkis. Ambaŭ montris bonegan scion kaj sukcesis respondi je preskaŭ ĉiuj demandoj.

• En salono Lapenna ne restis lokoj dum la prelego de J. Ŝemer "Kio kaj kiu estas judo?". Tial kelkaj alvenintoj ne povis resti. Kiam meze de la prelego ies poŝtelefono sonoris, diris tuj la preleganto: "tio estas verŝajne unu de la kongresanoj, kiuj devis resti ekster la salono, do nun li deziras aŭdi la prelegon per la telefono..."

• Ĉi-jare la kongresejo estis tiel malgranda kaj kompakta, ke por trovi iun ajn oni bezonis nur kelkajn minutojn da serĉado.

• La kongresa kuriero portis la nomon Stel-Avivo senpaŭze (aŭ se vi volas: Stela vivo...). (Atentu: la preskaŭ oficiala slogano de la urbo Tel-Avivo estas: Urbo senpaŭze). Redaktis ĝin...kroato, Josef Pleadin. Eble en Zagrebo venontjare la redaktoro estos el Brazio?

• La plej populara angulo de la kongresejo estas la loko apud la akvo-cisterno. Oni liveris tie mineralan akvon senpage, senlimige kaj senĉese kaj la LKK aperigis afiŝojn kun la teksto: "Trinku multe en tiu varma vetero".
  Tion-ĉi oni nomu: Akvo senpaŭze.

• La kurso Hebrea Eksprese estis tiel populara, ke oni devis dividi ĝin en du grupojn. La instruanto Eldad Salzman instruis ankaŭ la araban lingvon eksprese.
  En la kongreseja kafejo deĵoris kaj judaj kaj arabaj Israelanoj, tiel ke fininto de ambaŭ kursetoj povis mendi kaj hebree kaj arabe la "espreson".

• Komence de unu de la kunsidoj de la Komitato de UEA je 09.00 matene staris (ankoraŭ restaĵo de hieraŭa provludo de artistoj) granda piano meze de la salono, malhelpante al la kunsidantoj ekdiskuti. Tiam unu de la Komitatanoj proponis kunludi anstataŭ kunsidi. Sed kion oni skribu tiam en la protokolo?

• Malgraŭ la plano, la bulgara dirigento de la kongresa koruso ne alvenis. Tial lastmomente s-inoj Elena Puhova (Rusio-Ĉeĥio) kaj Tova Ben-Cvi (Israelo) transprenis la sceptron kaj gvidis la kongresanojn-korusanojn, instruante ilin esperantigitajn hebreajn kantojn k. a. Fine okazis sukcesa prezentado de la ĥoranoj dum la Internacia Arta Vespero.

• Ĉi-jare, pro la speciala turisma karaktero de la gastiga lando, okazis tuttagaj ekskursoj preskaŭ ĉiutage. Multaj kongresanoj vagis de unu ekskurso al la alia kaj tiel okazis ke kelkaj konatiĝis bone nur kun la lando, sed ne kun la kongresejo... Estis do pli da ekskursANOJ ol eksKURSANOJ...

• La jidlingva kantisto Uri Rabinovic, kiu ovacie kantis dum la Nacia Vespero, revenis surprize la morgaŭan vesperon al la kongresejo kaj honorigis la e-istojn dum la Kongresa Balo per kelkaj jidaj kantoj, kun granda sukceso.

  Kongresaj anekdotoj

• Vojaĝanta Tali: En la inaŭgura tago Tali Wandel devis multe vojaĝi: frumatene al la televida studio en Jerusalemo, kie ŝi partoprenis la matenan novaĝprogramon "matena kafo" pri E-o kaj la kongreso, de tie al Tel Avivo, kie ŝi salutis la kongreson nome de Israelo, kaj postagmeze al Hadassim, por partopreni la infanan kongreseton. En la IIK ŝi fakte ĉeestis nur 5 tagojn, ĉar ŝi revenis al Tel Avivo unu tagon antaŭ la fino, por kunprezenti la Internacian Vesperon.

• Ekskursa Kongresa Universitato: Dum la kvara AIS/IKU prelego pri Josefus Flavius, IKU rektoro Amri Wandel surprizis la prelegantinon d-ro Vera Barandovska-Frank per nekutima interveno, rakontante ke la temo estis traktita ne nur dum la prelegoj, sed ankaŭ dum la kongresa ekskurso al Masado, kiun li interpretis en la antaŭa tago: niaj informoj pri la heroa tri jara batalo de Masado kontrau la romianoj venas de la priskriboj de la historiisto Flavius, kaj post la malkovro kaj elfodado de Masado ili montriĝis tre akurataj.

• La misprononcoj de la vicurbestro: la vicurbestro de Tel Avivo, s-ro Natan Wolloĉ, salutis la inaŭguron en preskaŭ senmakula e-o, krom kelkaj orelfrapaj interŝanĝoj de la konsonantoj p kaj f. La kialon poste klarigis Amri Wandel, kiu preparis la tradukon: en la hebrea alfabeto tiuj du konsonatoj estas skribataj per la sama litero, kaj la diferencon oni indikas per punkto. S-ro Wolloĉ verkis sian saluton hebrelingve, kaj la esperantan tradukon li petis transkribi hebrelitere. ĉar la hebrea transskribo estis sendita fakse, verŝajne kelkaj punktoj elfalis aŭ aldoniĝis survoje...

• E-Ekzameno por la urbestro: Dum la urbodoma akcepto Kep Enderby donacis al la urbestro de Tel Avivo, s-ro Ron Huldai, abundon da libroj. La urbestro humure demandis, ĉu venontjare li devos ekzameniĝi pri la enhavo. Tiun humuron oni povas pli bone kompreni pro la antaŭa profesio de la urbestro, kiu dum multaj jaroj estis direktoro de la Tel Aviva gimnazio "Hercelija"...

• Ekstra ekskursa ero: Makabim. La partoprenantoj de la tuttaga (sabata) ekskurso al Masada kaj de la postkongreso en Jordanio ĝuis neatenditan ekstran viziton: uzante alternativan vojon al Jerusalemo, oni vidis la plej novan urbon en Israelo, Modiin, kaj la apudan novtipan komunuman vilaĝon Makabim, kie ne-hazarde troviĝis la hejmo de la interpretisto Amri Wandel.

• Tro entusiazma interpretisto: en la antaŭkongresa seminario en Pacoazo okazis prelego de araba gast-preleganto pri la historio de la konflikto inter judoj kaj araboj. La interpretisto, Jeremi Giŝron tiom entusiazmiĝis ke kiam unu el la audienco faris demandon, Giŝron ne interpretis ĝin por la preleganto sed respondis mem...

• La tria lingvo. Dum la kongrestema prelego de Amri Wandel "La du lingvoj de Abrahamo" pri la kunekzisto de la araba kaj la hebrea en Israelo, la reĝisoro Boris Kolker rimarkigis ke nuntempe oni devus aldoni trian lingvon: la rusan, pro la amasa enmigrado de rus-devenaj judoj. Oni povus do modifi la nomon de la prelego al "la tri lingvoj de Abraŝa"...

• La plej konciza historio de la Kreado: laŭ la scienco la Tero kaj la vivo sur ĝi evoluiĝis dum proksimume ses miliardoj da jaroj, laŭ la biblio Dio kreis la mondon en ses tagoj, sed la IKU prelego "Ses tagoj de kreado" kiu komparis la du daŭris nur sesdek minutojn...tiu tempo tamen sufiĉis al la preleganto Amri Wandel ĵongli inter tri rimedoj de prezentado - komputilo, lumbildoj kaj projekciilo.

• La malaperintaj salutsignoj: la urbestraro de Tel Avivo konsentis fiksi en ĉefaj stratoj de Tel Avivo 15 duflankajn rondajn ŝildojn kiuj salutas la kongreson. Laŭdire ili estis fiksitaj laŭlonge de haJarkon strato (kiu pasas apud la kongresejo), sed neniu kongresano vidis ilin. La mistero estis solvita nur fine de la kongreso: haJarkon estas tre longa strato, kaj oni fiksis la ŝildojn ĉe ĝia alia (norda) ekstremo. La autobusoj kiuj ekveturis norden al la postkongreso en Jordanio pasis ĝuste ĉe tiu parto, kaj la ekskursantoj ĝuis la spektaklon.

• Kien malaperis la LKK prezidantoj? Komence de la solena fermo mankis ĉe la podia tablo LKK prezidanto Amri Wandel. Li estis serĉanta la E-flagon kiu devus esti transdonita al la LKK de la venontjara UK. Fine li forprenis la flagon el la masto en la hotela lobio. Kiam venis la tempo transdoni la flagon, forestis la prezidanto de la Zagreba LKK, Spomenka Stimec, kiu estis dum tiu tempo renkontiĝanta diplomaton en la kroatia ambasadejo...

• Improviza Vida: apenaŭ iu el la centoj de entusizamaj spektantoj de la teatraĵo "La Poto" far la aktorino Vida Jerman rimarkis la paneon: la sonteknikisto eraris ŝanĝante la akompanantan muzikon, kaj mem ne rimarkis tion. La sperta Vida ne panikis, kaj per la sama tono kiel la rolulino diris "Kio okazis kun la sono?" tion tamen rimarkis Esti Saban, kiu sekvis la tekston apud la teknikisto kaj tuj korektis la eraron.

• Salono Zamenhof en Petra: dum la postkongreso en Jordanio la interpretisto Amri Wandel uzis la ŝildon kiu signis la direkton al la kongresaj salonoj - Zamenhof, Lapenna, Kohen Cedek kaj Hodler - por kunvoki la ekskursantoj. Sekve tiu ŝildo fariĝis la signo de la grupo kaj aperas en multaj el la grupaj fotoj de Jeraŝ ĝis Petra.

• La postkongreso en la Jordania televido: dum la vizito de la postkongresa ekskurso en la elfosita romia urbo Jeraŝ en la nordo de Jordanio, la grupo estis haltigita ĉe la ŝtuparo de la templo de Artemis, teamo de la Jordania televido, kiu filmis tunizian kantistinon kun la templo fone. La reĝisorino improvize profitis la ne atenditan E-grupon: ŝi petis ĉiujn samtempe foti la kantistinon kaj direktis kameraon al la admire fotanta grupo. Tiel povas esti ke la kongreso aperis ne nur en la israela, sed ankaŭ en la Jordania televido.

• Nepre ŝtatprezidanto: serĉante kandidaton por la Alta Protektanto, oni decidis peti la tiaman prezidenton de Israelo, s-ron Ezer Weizman. Kiam montriĝis, pro personaj problemoj, ke li verŝajne demisios antaŭ la fino de sia mandato, la LKK admonis ne proponi al Weizman sed al ministro Ŝimon Peres, kiu onidire estis la plej verŝajna kandidato por la prezidenteco. Kvankam UEA fine tamen proponis al Weizman, li (bonŝance) ne respondis, kaj post atendado de kelkaj monatoj oni invitis Peres esti AP. Post longa kampanjo Peres akceptis, preskaŭ en la lasta momento. Kiel antaŭvidite, Weizman ja demisis antaŭ la kongreso, kaj la prezident-elektoj okazis en la antaŭlasta tago de la kongreso. Ĉiuj estis certaj ke la 85a UK fine tamen havos ŝtatprezidanton kiel AP, sed okazis granda surprizo, kaj kontraŭe al ĉiuj antaŭaj enketoj, la konkuranta kandidato Moŝe Katsav estis elektita. Kvankam la AP fine ne estis elektita, la kongreso tamen havis ŝtatprezidenton, ĉar Katsav estis membro de la Honora Komitato, kaj nome de la kongreso oni sendis al li gratulan fakson.

• Biblia UK:
  En la unua UK en la lando de la Biblio, pluraj programeroj rilatis la Biblion: multaj ekskursoj celis bibliajn lokojn, kiel Jerusalemo kaj BetLehemo, Eldad Salzman instruis la biblian lingvon (la hebrean..), Amri Wandel prelegis pri la du lingvoj de Abrahamo kaj komparis la biblian kaj sciencan tezojn pri la kreado de la mondo, kaj eĉ la prezentantoj de la internacia vespero, Moisej Bronstejn kaj Tali Wandel elektis vojaĝon tra la biblio kiel kadron de la prezentado. Malpli konata biblia rilato estis la neoficiala moto de la LKK, pruntita de diraĵo de Ben Gurion: "por organizi kongreson en la lando de la Biblio oni devas kredi je mirakloj".

Ree al la Postkongresa paĝo