STEL-AVIVO

 

Senpaŭze

 

5

AZIA AGADO

    Okazos dufoje la kunsidoj pri azia movado:

    - la UNUA kunsido okazos en la nomo de Azia Komisiono, kadre de fermita kunsido, je la 13h30 dimanĉe en la salono Dratwer, kaj partoprenos nur KAEM-anoj kaj po unu plenrajtigita reprezentanto de landaj asocioj.

    - la DUA kunsido okazos je la 14h15  lundon en la sama salono, nome de azia agado, kiun rajtos parto­preni ne nur ĈIUJ azianoj sed ankaŭ ali-kontinentanoj. KAEM  bonvenigas multajn partoprenantojn en la kun­sido.

 

A›TORAJ DUONHOROJ

Dimanĉon:

je la 11h00 Gunnar Gallmo, aŭtoro de “Mok­rokalvo”, interpreto de skandinavaj mitoj;

je la 16h00 Yasuo Hori, regula kunlaboranto de “Monato”, aŭtoro de tri volumoj de “Raportoj el Japanio”.

 

Lundon je la 16h00  Geraldo Mattos.

 

 

 

AFRIKO (2)

    Vendredon, la 28-an de julio 2000 okazis la dua afrika kunveno. Dek tri gesamideanoj klopodis serĉi rimedojn por pro­gresigi la movadon en Afriko. Temis ĉefe pri efektivigo de la plano

 

PRIORITATO AFRIKO

La ĉi-sekva agad-programo de UEA havas la nomon de simila programo de UNESKO, kvankam la enhavo, en tiu ĝener­ala kadro, rilatas precipe al tio, kion la Esperanto-movado povos fari en Afriko dum la venontaj jaroj. La vorto “priori­tato” montras la punktojn, kiujn afrikanoj trovas prioritataj en sia agado.

1-a punkto: Esperanto: lingvo afrika - Temas pri komenca instruado de la lingvo al afrikanoj laŭ la ĝisnuna praktiko. Pli da emfazo estu donata al instruado pere de afrikaj lingvoj, al instruado fare de afrikanoj mem, al instruado de perfektigaj kursoj, al tradukado al Esperanto de literaturaj verkoj en afrikaj lingvoj, al verkado de libroj fare de afrikanoj.

2-a punkto: Esperanto: movado afrika - Temas pri klopodoj por stabiligi la movadon en landoj, kie ĝi ekzistas, doni prestiĝon al ekzistantaj Landaj Asocioj kaj fondi aliajn en landoj, en kiuj ili ne ekzistas. Ankaŭ pri la stabiliĝo de la Afrika Oficejo temas ĉi tiu punkto. La landaj movadoj komencu financi sin mem kaj gvidi la informadon ankaŭ al lando, kie nun ne estas esperantistoj.

3-a punkto: Esperanto-lernejoj - Temas pri malfermo de lernejoj en afrikaj landoj: akirado de grundo kaj konstruado sur ĝi de la lernejo. En ĉiu lando, la lernejoj funkciu kiel normala enlanda lernejo laŭ la enlandaj leĝoj, kaj Esperanto estu instruata en ili. La unua eksperimento okazos en Togolando.

4-a punkto: Helpo al afrikaj lernejanoj - Kolektado de eŭroplingvaj lernolibroj, ĉefe pri teknikaj fakoj, kaj donacado de ili al afrikaj lernejanoj.

5-a punkto: Fondaĵo Afriko - Temas pri kolektado de sufiÊe granda kapitalo, el kies rento oni povos financi la agadon en Afriko.

6-a punkto: Realigo de etaj projektoj - Temas pri trovado de helporganizoj, grupoj aŭ unuopuloj, kiuj financu projektojn de afrikaj esperantistoj. Bestobredado, agrokulturo, fiŝado, ktp.

7-a punkto: Integriĝo de Afriko en la tutmonda Esperanto-komunumo - Ne manku afrikanoj en la gvidorganoj de la inter­naciaj Esperanto-organizaĵoj, precipe TEJO kaj UEA. Estu klopodoj, ke afrikanoj povu ofici en la CO de UEA, volontuli por UEA aŭ TEJO.

     La tuta agado okazos sub la respondeco de la Afrika Komisiono de UEA, kiun vi povos kontakti rete je la adresoj: Gbeglo Koffi - esp.togo@cafe.tg aŭ Hans Bakker - hbakker@groenlinks.nl.

 

      Ĉiuj partoprenantoj faris belegajn proponojn, kiuj ege helpos en la realigo de la plano. La disponebleco de la sudafrika movado kontribui en tio estas tute granda sukceso jam. Ĉar Afriko helpas al Afriko. Afriko ŝatus esti memstara: la realigo de la projekto igos, ke la movado en Afriko, per sia funkciado daŭre, ne atendos, ke mono unue iru en la kason de la Afrika Fondaĵo. Aliaj kongresanoj kontaktu la Afrikan komisionon, proponante rimedojn.

OPINIOJ PRI LA 85-a UK

 

LA›DOJ

 

La prelego “Juda humuro” estis perfekta. Bonŝance jam hejme mi legis fake pri la temo. Kun plej granda intereso  kaj plezuro mi aŭskultis. Elkoran dankon! (k.n. 647)

 

KRITIKOJ

 

Starante mi ĉeestis dum aranĝo en salono Dratwer. Ĉirkaŭ 8 personoj sidis sur la planko. Mi iomete ne komprenis la situacion, ĉar estis loko por dek pliaj seĝoj. (k. n. 474)

 

Mi volis partopreni en iu ekskurso sabate. En la unuaj tagoj la atendovico estis longa. Kiam mi devis pagi, neniu ekskurso havis liberajn seĝojn. “La koverto estis malplena”. Mi espe­ris, ke ili povos havi  alian liston. (k. n. 331)

 

 

KUNVENO DE

EPĈ-LEGANTOJ

     En la salono Hodler okazis kunveno de legantoj de “El Popola Ĉinio”, kiun prezidis la redaktoro kaj partoprenis ĝin redakcianoj. La gazeto, kiu en majo festis sian 50-jariĝon, fariĝis grava informilo de la Ĉina Respubliko kaj E-movado ĝenerale.  Estis proponoj ke la gazeto iom ŝanĝu la redakciajn tekstojn, ke estonte ĝi aperigu pli da literaturaĵoj, pli da tek­stoj pri Esperanto tra la mondo, eĉ pri apero de la infana paĝo.

   Kvankam “El Popola Ĉinio” fariĝis fakte internacia, kun kelkmil abonantoj tra la tuta mondo, la partoprenintoj estis por plia inter­naciiĝo de la gazeto.

     Krom tiu kunveno okazis ankaŭ kunveno de aŭskultantoj de Ĉina Esperanto Radio Interna­cia, kiu antaŭ nelonge festis 35-an datrevenon. Fakte, ĉi tiu radio-stacio ne estas aŭdebla tra la mondo, pro kio la ĉeestantoj klopodas ke ĝi atingeblu pere de interreto. Tiam la aŭskultantoj estus dekoble pli multaj.

(k. n. 670)

 

IKEF, Internacia Komerca kaj Ekonomia Fakgrupo, lundon vizitos la faman ESHED, produktanton de robotoj kaj aliaj altteknologiaj sistemoj.

Aliĝu ĉe la budo de IKEF.

Partopreno en buskostoj: 20 sikloj.

Forveturo: lundon je la 9h00, antaŭ la kongre­sejo.

(k. n. 523)

 

BANKEDO KAJ

KONGRESA BALO

     “Mi ne bankedas, ĉar la manĝo neniam valo­ras la elspezon”, mi ofte aŭdis dumkongrese. Ĉi- jare tio certe ne taŭgas. Ne nur la pladoj estis tre diversaj kaj bongustaj, ankaŭ pri trinkaĵoj oni bone zorgis. Eĉ post la deserto oni ne nur alportis kafon aŭ teon, sed ankaŭ denove akvon kaj oranĝosukon tiel ke alvenintaj amikoj por la balo iom povis profiti. La orkestro tiel bone muzikis ke homoj kiuj intencis nur iom flari la etoson sub­ite troviĝis inter la dancantoj. Granda surprizo estis, ke la kantisto de nacia vespero denove kan­tis por ni. Preskaŭ seninterrompe la muzikistoj ludis kaj la aŭskultantoj/dancantoj amuziĝis. Ĉu nun iliaj piedoj doloras kiel la miaj?

(k. n. 182)

BRILAJ PREZENTOJ

    Ne estas kutimo laŭdi preleganton de la internacia kongresa universitato antaŭ ol la serio de lia/ŝia prelegoj finiĝis. Mi tamen jam nun volas atentigi ĉiujn legantojn de la kuriero pri la okazaĵoj en la salono Olswanger, kie s-ro Tonkin eble klopodas prelegi pri la verkoj de Shakespeare, sed ofte li vere ludas la spektaklojn. La homoj kiuj devas frue vekiĝi por ĉeesti, revenas. Gajaj ridoj de tempo al tempo ondas tra la salono. Kuniĝas memoroj pri legitaj aŭ vidi­taj spektakloj kun deziro spekti pli.

(k. n. 182)

AĈETEBLAS

KASEDOJ PRI LA

NACIA VESPERO

Aĉetu ĉe la Informejo!

 

KATOLIKA MESO okazos dimanĉon je la 12h00 en la preĝejo de Sankta Petro en Jafo, kiun oni atingas piede laŭ la strato apud la strando, aŭ per buso n-ro 8,  de la haltejo kontraŭ la kongresejo. La meson celebros pastro Manfred Odenwald (k.n. 631).

 

 

MEDICINISTA KUNVENO

    Ĵaŭde, la 27-an de julio okazis la kunveno de la Universala Medicina Esperanto-Asocio (UMEA). Ĉeestis 28 personoj el 15 landoj. Prezidis kaj raportis d-ro I. FERENCZY (k.n. 288). Li raportis inter aliaj pri la sukcesa kunlaboro kun la fervojistoj (IFEF). Dum la fervojistaj E-kongresoj UMEA donis la san­itaran deĵoron ili interŝanĝis eldonaĵojn ktp.

     La ĉi-jara UMEA - SHINODA-PREMION rice­vis s-ino GU JIENHUA (Ĉinio) pro sia verkita vor­taro Esperanta-ĉina-angla. Venontjare estos la 100- jara naskiĝdatreveno de d-ro HIDEO SHINODA, iama prezidanto de la Asocio. Li mortis en la jaro 1984. UMEA deziras inde festi la datrevenon. La Internacia medicinista E-konferenco okazos en urbo OSIJEK, antaŭ la UK (Zagrebo, Kroatio).

    Inter la alparolantoj, prof. R. SACHS, prezidanto de ISAE salutis la ĉeestantojn kaj proponis viglan kunlaboron kun la medicinistoj.

d-ro I. Ferenczy (k.n. 288)

 

 

NACIA VESPERO

    Kvankam la kvalito de la spektaklo estis tre kontentiga, oni povas bedaŭri, ke ĝi ne vere kongruis kun la kongresa temo.

    Dancistaro militvestita ne tre taŭge ilus­tris “kulturon de paco”, krome dum kon­greso de pacamantoj.

    Oni povas ankaŭ esperi ke la araba kul­turo aperos alimaniere ol tra la Jemen- hebrea.

    Mi eĉ konfesas, ke mi reve imagis spek­taklon finiĝantan apoteoze per komuna pro­gramero de du artistaj grupoj, unu hebrea, alia araba, unuiĝintaj en esperantlingva kanto. Tio jes ja estus respegulinta la kon­grestemon “Lingvo, kulturo de paco”. Bonŝance, la revo ĝuste ekzistas por helpi min eskapi la realan vivon.

(k. n. 479)

 

 

ALVOKO AL KRISTANOJ

     Karaj kaj estimataj kristanaj gefratoj inter la parto­prenantoj de la 85-a UK!

    La KELI-prezidanto pastoro Adolf Burkhardt petis la germanan KELI-membron Gerhard Hofmann preni la respondecon pri la kunveno de la Kristana Esperanta Ligo Internacia.

   La KELI-kunveno okazos lunde (31-an de julio) inter 12h30 kaj 14h00 en la salono Dratwer (Golan). Kune kun d-ro Puramo Chong, kiu estas KELI-mem­bro ekde 25 jaroj, G. Hofmann preparis programon, kiu verŝajne estos interesa por ĉiuj kristanoj. Inter­alie vi aŭdos salutvorton de A. Burkhardt per son­bendo kaj prelegeton de P. Chong pri la situacio de kristanismo en ambaŭ (suda kaj norda) Koreioj.

   Ĉar dum nia UK ne okazos ekumena diservo ni tre kore invitas ĉiujn kristanojn partopreni al la KELI- kunveno.

    Gerhard Hofmann              Puramo Chong

 

 

FERVOJISTA KUNVENO

    Vendrede, la 28-an de julio okazis la kon­taktkunveno de IFEF. Istvan Gulyas, vicprezidanto de IFEF prezidis kaj raportis pri la pasinta IFEF-kongreso.

    La kunvenon ĉeestis 21 kongresanoj el dekunu landoj.

     En la nomo de la Estratro de UEA Petro Chrdle salutis la ĉeestantojn, kaj detale informis pri la sekvontjara IFEF kongreso okazonta en Tabor (Ĉeĥio).

   D-ro  Imre  Ferenczy, prezidanto de UMEA faris fakprelegon pri la spertoj de la kunlaboro inter fervojistoj kaj medicinistoj.

   Poste sekvis vigla diskuto pri movadaj aferoj, varbeblecoj, edukado kaj pri la manko de la junularo en la Esperanto- movado.

(k. n. 287)

 

 

ATENTU! Hungardevenaj esperantistoj kiel kutime dum la UK-oj oni ren­kontiĝas la 30-an de julio 2000 (dimanĉe) je la 19h30, ĝis la 20h30 en la salono Hodlet. Oni atendas vin. VARUNK.

 

 

SAT-kunveno

    La 27-an de julio en la salono Maschler inter la 11h45 kaj 12h30 okazis kunveno de SAT, kiun gvidis Yamasaki Seiko. La SAT-plenumkomitaton reprezentis Floreal Gabalda. Par­toprenis 40 homoj, el kio 14 nemembroj de SAT.

    Nome de faka agado de UEA la kunvenon salutis Petro Chrdle. Sian mesaĝon al la kunveno sendis Yves Peyrant, kiu elstarigis la neceson de unuiĝo por trovi taŭgan solvon de la ekzistantaj krizoj.

    El la demandoj de la partoprenantoj ni elstarigu la jenajn:

- Jacques Caubel rekomendas, ke la landnomoj klare aperu, sed la respondo ricevita estis, ke SAT-membroj estas mond­civitanoj, kaj tial la landnomo ne gravas.

- Margarete Bettmann demandis ĉu estas arabaj SAT-mem­broj. Ĉar la asocio ne atentas pri tiaj statistikoj, la demando estas malfacile respondebla. Ĉiuj, kompreneble ankaŭ araboj, estas bonvenaj en SAT

- Vincent Charlot petis pri raporto el la ĵus okazinta SAT- kongreso en Moskvo. Yamasaki, kiu partoprenis nur dum 3 tagoj, donis skizon. Li aparte elstarigis la proponon de Martin Bustin, kiu sugestas ke la SAT-plenumkomitatanoj ne devige estu nur en la sama urbo.

    Kep Enderby, SAT-membro, nuna prezidanto de UEA, elstarigis, ke la nocioj pri naciismo, naciulo estas nur en la homaj mensoj, ĉar la homoj nur hazarde naskiĝas en unu aŭ alia loko.

    Dieter Rooke demandis “Kio estas SAT?”, kaj Gabalda sendos detalajn informojn.

(redakcia teksto laŭ la protokolo de G. Ledon)

 

 

ARTISTOJ KAJ ARTISTINOJ

KIE VI ESTAS?!?

NI ATENDAS VIN DIMANĈON JE LA 11h00 ANTA›  la ENIREJO de LAPENNA

Provludoj por la Internacia arta vespero daŭros ĝis la 14h00 en la salono Zamenhof.

(Tiuj kiuj venos post la 11h00 devas serĉi la malantaŭan enirejon (ĉe kafo-baro) al Zamen­hof, ĉar ne eblas eniri tra la salono Lapenna).

 

 

ANONCO POR KANTEMULOJ

INTERNACIA ĤORO

FUNKCIAS

Gvidas: Tova Ben-Cvi (Israelo) kaj

Elena Puĥova (Rusio-Ĉeĥio)

Venu laŭ la tempo anoncita en la Kongresa libro.

(Vendredon kaj dimanĉon je la 18h30

kaj lundon je la 12h30).

 

 

Anonco por la partoprenintoj de la

PLAĜBALO

(okazinta lastan mardon)

La LKK decidis redoni al vi parton de la pagita kotizo. Pri la preciza sumo oni povos decidi nur post la fintraktado kun la “nutriga” restoracio. La repago estos farota per kreditigo de la UEA-konto de la mendintoj.

 

 

KUNVENO DE VIRINOJ NE MANKIS ANKAŬ ĈI-JARE

    Ĵaŭde ek de la 10h45 ĝis la 11h30 en Salono Maschler  okazis la kunveno de Virina Agado. Ĉees­tis 25 homoj kaj gvidis f-ino CHOI YUN HUY, Hortensio.

    Jam pasis du jaroj de kiam ĝi fondiĝis kaj la ĉees­tantoj rimarkis, ke membroj solidariĝas jaron post jaron kaj ili proponas pli konkretajn aferojn por virina agado.

    Estis kelkaj proponoj jene:

    • ni aliĝu al UEA en baldaŭa estonteco,

    • ni elektu multe da virinoj agemaj kaj laboremaj en Esperantujo,

    • ni laboru ne nur ene de movado, sed ankaŭ ekster ĝi,

• ni interŝanĝu opiniojn kaj proponu per ret-poŝto,

    Ne mankis kritikoj pri la diskriminacio inter viroj kaj virinoj jene:

• ofte oni elektas virojn por labori kaj virinojn por ornami eĉ en Esperantujo,

    Unu grava miskompreno estas ke virina movado estas feminisma movado, sed ne.

   Laste gvidantino proponis, ke ni havu propran hejmpaĝon se eblas.

     Virina agado daŭre havas jarkunvenon en estontaj UK-oj kaj en aziaj kongresoj.

    Apartan dankon al viraj ĉeestantoj, speciale al d- ro Werner Bormann.

(k. n. 227) hortensio@hanmail.net

 

 

TEMPOTRAKO

UNUAFOJE EN UK

    La TEMPOTRAKO estas sociala terapio, kiu helpas la homojn liberiĝi de antaŭnaske spertitaj ŝokoj kaj traŭmoj.

      Ĝi funkcias jam plurajn jarojn en Germanio, iris dufoje al Afriko. En 1990, dum la Unua afrika kon­greso en Togolando, ĝi estis prezentita al la kongre­sanoj. En julio 1995 okazis unusemajna seminario pri ĝi en la ĉefurbo Lome de Togolando.

    Travagante nun la tutan mondon, ĝi atingas ankaŭ la Universalan Kongreson de UEA.

    Dum la 85-a UK en Tel-Aviv la metodo estas prezentata al la kongresanoj pere de Margareta Bettmann (k. n. 121) ĉe la budo “Tempotrako” - Afrika agado kaj Gbeglo Koffi (k. n. 95).