Kongresaj ekskursoj en Israelo

Gheneralaj kondichoj
Char chiuj ekskursoj dependas de minimumo da partoprenantoj, la organizanto rezervas al si la rajton eventuale nuligi iujn ekskursojn, pri kio ni klopodos averti vin kiel eble plej frue antaù la kongreso, kun propono de eblaj alternativoj. Chiuj ekskursoj startas de la kongresejo, kaj revenas tien. Klopodu veni dek minutojn antaù la indikita starthoro de la ekskurso. Chiujn ekskursojn akompanos E-lingvaj interpretistoj. Ili ne estas profesiaj chicheronoj sed nur bonvolaj helpantoj. Bv. indulgi ilin per pacienco kaj samideana komprenemo. Ili faros sian plejeblon por bone servi al vi. Chiuj prezoj estas en eùroj (1 EUR egalas 2.20371 NLG).

• Antaùkongresaj ekskursoj en Israelo
• Postkongresaj ekskursoj en Israelo
• Dumkongresaj ekskursoj
• Duontagaj ekskursoj

Antaùkongresaj ekskursoj en Israelo

A2 Rondvojagho tra Israelo

18-24 de julio

Mardo, 18.07 Alveno kaj bustransporto al hoteloj en Tel-Avivo.
Merkredo, 19.07 Veturo norden al Cezareo, iama chefurbo de la romia provinco Palestino. Vizito al romia amfiteatro kaj akvedukto, kaj la kruckavalira fortikajho. Daùrigo al Hajfo, suprenveturo al monto Karmelo por vidi unikan panoramon, kaj vizito al la Bahaa Monda Centro. Daùrigo al Akko, havenurbo jam en antikveco, vizito al kruckavalira fortikajho kun la Haloj de la Kavaliroj. Tranokto en Tiberiado.
Jhaùdo, 20.07 Mallonga shipveturo sur Tiberiada Lago ghis la kibuco Nof Ginosar. Daùrigo al Kapernaùmo, la agadcentro de Jesuo, kaj vizito tie al restajhoj de antikva sinagogo el la periodo de la Dua Templo. Vizito al Tabha, kie Jesuo faris miraklon satiginte 5000 homojn per kvin panoj kaj du fishoj. Vidindas tie la mozaiko kiu priskribas la miraklon. Sekvos suprenveturo al la Golana Altebenajho por vidi antaùan pozicion de la siria armeo, kaj la sirian limon. Tranokto en Tiberiado.
Vendredo, 21.07 Forveturo al Jardenit, loko por baptaj ceremonioj en la rivero Jordano. Daùrigo al la vilagho Kana, kie Jesuo dum festo faris vinon el akvo. Sekvos Nazareto, kie al Maria estis anoncite: ".. Kaj vi gravedighos en via ventro kaj naskos filon, kaj vi nomos lin Jesuo (La Anunciacio)". Veturo al Bejt Shan, urbo kun romiaj restajhoj, kaj laùlonge de Jordano, tra Jeriko, al Jerusalemo. Survoje, halto en Betanio, kie Jesuo mirakle relevis Lazaron, la fraton de Maria. Tranokto en Jerusalemo.
Sabato, 22.07 Ekveturo al Monto Oliva por vidi panoramon de la Malnova Urbo. Sekvos vizito al sanktaj lokoj ligitaj kun la vivo de Jesuo, unuavice, "La Dolora Vojo" (Via Dolorosa), kaj la Preghejo de la Sankta Sepultejo, kie Jesuo estis entombigita. Daùrigo al la "Okcidenta Murego" (Murego de la Lamentoj), relikvo de la Dua Templo, la plej sankta loko por judoj. Post mallonga promeno tra la malnova juda kvartalo, vi forlasos la malnovan urbon, kaj vizitos la ejon de la Lasta Vespermangho. Tranokto en Jerusalemo.
Dimancho, 23.07 Vizito al la "Sanktejo de la Libro" por vidi la "Skribrulajhon de la Morta Maro". Veturo al la Parlamentejo (Kneset), kaj poste al Jad Vashem, la memorigejo dedichita al la ses milionoj da judoj pereigitaj en la Holokaùsto (Genocido) de la dua mondmilito. Vi daùrigos al la hospitalo Hasada por viziti la sinagogon kun la famegaj vitraloj de Marc Chagall, reprezentantaj la tribojn de Izraelo. Posttagmeze veturo al Betlehemo (Bejt-Lehhem), la naskighurbo de Jesuo, kaj vizito al la Preghejo de la Naskigho. Tranokto en Jerusalemo.
Lundo, 24.07 Post mallonga veturo vi atingos la Mortan Maron, kiu situas je la plej malalta punkto sur la tersurfaco. Veturante laù la marbordo vi atingos la fortikajhon Masada, kiu trovighas sur nesurgrimpebla monto. Ghi estis la lasta juda bastiono kiu kontraùstaris la romianojn post la detruo de la Dua Templo. Kiam la romianoj sukcesis surgrimpi kaj konkeri la fortikajhon, dank’ al konstruo de ramplo el tero, la venkitoj decidis mortigi sin anstataù sklavighi. Vi supreniros la monton per telfero kaj vizitos la fortikajhon kun ghiaj konstruajhoj. Veturo al Tel-Avivo, fino de la vojagho.
(Necesas mendi loghadon en Tel-Avivo ekde la 24-a julio).
Inkluzivita: veturigo de flughaveno al la hotelo Tal (tranokto, matenmangho) en Tel-Avivo, kaj poste de Tel-Avivo, kun faka chicherono kaj E-lingva interpretisto, 6-aga ekskursado, 6 tranoktoj en unuaklasaj hoteloj (kun 6 israelaj matenmanghoj kaj 5 vespermanghoj) kaj chiuj enirbiletoj menciitaj en la itinero. La busoj estas luksaj kaj klimatizitaj. Ne inkluzivita: lunchoj, trinkajhoj, personaj elspezoj kaj trinkmonoj.
Prezoj. Loko en: unulita chambro 945 EUR; dulita chambro 725 EUR.

A3 Nordo de Israelo kaj la altebenajho Golano

23-24 de julio

Dimancho, 23.07.Veturo al Nazareto, hejmo de Maria , Jozef kaj Jesuo, kie anghelo anoncis al Maria "kaj jen vi gravedighos en via ventro kaj naskos filon, kaj vi nomos lin JESUO" (La Anunciacio). Daùrigo al Kana, kie dum festo Jesuo faris vinon el akvo, kaj al Jardenit, loko por baptaj ceremonioj en la rivero Jordano. Alveno al Tiberiado de kie surshipe vi atingos Kapernaùmon, la agadcentron de Jesuo, kaj vizito al restajhoj de antikva sinagogo el la periodo de la Dua Templo. Daùrigo al Tabha, kie Jesuo mirakle satigis 5000 homojn per kvin panoj kaj du fishoj. Veturo al Safed, hejmo de famaj "kabalistoj" (saghuloj kiuj okupighas pri "Kabalo", la mistiko kaj mistero de la juda religio) jam en la deksesa jarcento. Vizito al la malnova sinagogo kaj al la kvartalo de la artistoj. Vespermangho kaj tranokto en kibuco Hagoshrim.
Lundo, 24.07 Veturo al Metula, la plej norda urbeto de Israelo, situanta che la limo kun Libano. Tie trovighas la tiel nomata "bona barilo", kiu servas kiel trairejo al la "sekureca zono". Sekvos suprenveturo al la Golana altebenajho, tra pitoreska regiono, kun haltoj che la fontoj de Banjas, kaj la vulkana lago Birket Ram. Daùrigo ghis observejo, de kie videblas la siria urbo Kunejtra, kaj sekve al nova israela urbo Kacrin, fondita en la jaro 1977. Veturo al Bejt Shan, urbo kun romiaj restajhoj, kaj laùlonge de la rivero Jordano, tra Jeriko, al Betanio, kie Jesuo mirakle relevis Lazaron, la fraton de Maria. Preterpasinte Jerusalemon, vi veturos al Tel-Avivo. Fino de la vojagho.
Inkluzivita: transporto de flughaveno Ben-Gurion al hotelo Tal en Tel-Avivo, (se vi volas ekstran nokton tie, necesas aparte mendi!) kaj tranokto en kibuco (kun israela matenmangho kaj vespermangho), dutaga ekskursado kun profesia chicherono kaj esperantlingva interpretisto, kaj chiuj enirbiletoj menciitaj en la itineroj.
Ne inkluzivita: lunchoj, trinkajhoj kaj personaj elspezoj.
Prezoj. Loko en: unulita chambro 185 EUR; dulita chambro 156 EUR.

Postkongresaj ekskursoj en Israelo

P2 Rondvojagho tra Israelo

1-6 aùgusto

Mardo, 01.08 Posttagmeze ekveturo norden al Cezareo, la iama chefurbo de la romia provinco Palestino. Vizito al romia amfiteatro kaj akvedukto, kaj al kruckavalira fortikajho. Alveno al Hajfo kaj tranokto.
Merkredo, 02.08. Post matenmangho suprenveturo al la monto Karmelo por vidi unikan panoramon. Vizito al la Bahaa Monda Centro. Daùrigo al Akko, havenurbo jam en antikveco, vizito al kruckavalira fortikajho kun la Haloj de la Kavaliroj. Norde de Akko, che la libana limo vi vizitos interesajn naturajn kavernojn, fositajn en la klifojn de la enpenetranta maro. Veturo al Tiberiado kaj tranokto.
Jhaùdo, 03.08 Mallonga shipveturo sur Tiberiada Lago, preter diversaj sanktaj lokoj, ghis kibuco Nof Ginosar. Daùrigo al Kapernaùmo, la agadcentro de Jesuo, kaj vizito al restajhoj de antikva sinagogo el la periodo de la Dua Templo. Vizito al Tabha, kie Jesuo faris miraklon satigante 5000 homojn per kvin panoj kaj du fishoj. Vidindas la mozaiko kiu priskribas la miraklon. Sekvos suprenveturo al Golana Altebenajho por vidi la antaùan pozicion de la siria armeo, kaj la sirian limon. Tranokto en Tiberiado.
Vendredo, 04.08 Forveturo al Jardenit, loko por baptaj ceremonioj en la rivero Jordano. Daùrigo al la vilagho Kana, kie Jesuo dum edzighfesto faris vinon el akvo. Sekvos Nazareto, kie al Maria estis anoncite "... kaj vi gravedighos en via ventro kaj naskos filon, kaj vi nomos lin JESUO" (La Anunciacio). Veturo al Bejt Shan, urbo kun romiaj restajhoj, kaj laùlonge de Jordano, tra Jeriko, al Jerusalemo. Survoje, halto en Betanio, kie Jesuo mirakle relevis Lazaron, la fraton de Maria. Tranokto en Jerusalemo.
Sabato, 05.08 Post unuhora veturo vi atingos la Mortan Maron, kiu situas je la plej malalta punkto sur la tersurfaco. Veturante laù la marbordo vi atingos la fortikajhon Masada, kiu trovighas sur nesurgrimpebla monto. Ghi estis la lasta juda bastiono kiu kontraùstaris la romianojn post la detruo de la Dua Templo. Kiam la romianoj sukcesis surgrimpi kaj konkeri la fortikajhon, dank’ al konstruo de ramplo el tero, la venkitoj decidis mortigi sin anstataù sklavighi. Vi supreniros la monton per telfero kaj vizitos la fortikajhon kun ghiaj konstruajhoj. Reveturo al Jerusalemo, fino de la vojagho.
Dimancho, 06.08 Post unuhora veturado preskaù enirante Jerusalemon, vi atingos la vilaghon Ejn Kerem, la naskighlokon de Johano la Baptisto. Vi vizitos la preghejon "Sankta Johano la Baptisto", en kies korto trovighas tabulo kun esperantlingva pregho (Benedictus). Forlasinte la vilaghon vi atingos la sinagogon de la medicina centrejo Hadasa, kun la mondfamaj vitraloj de Mark Shagal (Marc Chagall). Temas pri dek du vitraloj reprezentantaj la dek du tribojn de Israelo. Sekvos la vizito al la memorigejo Jad Vashem, dedichita al la ses milionoj da judoj pereigitaj dum la dua mondmilito, viktimoj de la Holokaùsto (genocido). De tie vi veturos al Kneset, la sidejo de la Israela Parlamento. La sekva vizitpunkto estos la "Sanktejo de la libro", parto de la Israela Muzeo kie estas eksponitaj la famaj "Skrib-rulajhoj de la Morta Maro", antikvaj hebreaj skribajhoj el la unua jarcento antaù Kristo, malkovritaj hazarde en 1947 de beduena pashtisto en kavernoj en Kumrano, apud la Morta Maro. Posttagmeze vi veturos al la naskighurbo de Jesuo, Bejt-Lehem, por viziti la "Preghejon de la Naskigho".
Inkluzivita: veturigo de Tel-Avivo, kun faka chicherono kaj E-lingva interpretisto, 6-aga ekskursado, 6 tranoktoj en unuaklasaj hoteloj (kun 6 israelaj matenmanghoj kaj 5 vespermanghoj) kaj chiuj enirbiletoj menciitaj en la itinero. La busoj estas luksaj kaj klimatizitaj.
Ne inkluzivita: lunchoj, trinkajhoj, personaj elspezoj kaj trinkmonoj.
Prezoj Loko en: unulita chambro: 885 EUR; dulita chambro: 665 EUR.

P3 Nordo de Israelo kaj la altebenajho Golano

2-3 de aùgusto

Merkredo, 02.08 Veturo al Nazareto, hejmo de Maria , Jozef kaj Jesuo, kie anghelo anoncis al Maria ,, .. kaj jen vi gravedighos en via ventro kaj naskos filon, kaj vi nomos lin JESUO" (La Anunciacio). Daùrigo al Kana, kie dum festo Jesuo faris vinon el akvo, kaj al Jardenit, loko por baptaj ceremonioj en la rivero Jordano. Alveno al Tiberiado de kie surshipe vi atingos Kapernaùmon, la agadcentron de Jesuo, kaj vizito al restajhoj de antikva sinagogo el la periodo de la Dua Templo. Daùrigo al Tabha, kie Jesuo mirakle satigis 5000 homojn per kvin panoj kaj du fishoj. Veturo al Sefad, hejmo de famaj "kabalistoj" (saghuloj kiuj okupighas pri "Kabalo", la mistiko kaj mistero de la juda religio) jam en la deksesa jarcento. Vizito al la malnova sinagogo kaj al la kvartalo de la artistoj. Vespermangho kaj tranokto en la kibuco Hagoshrim.
Jhaùdo, 03.08 Veturo al Metula, la plej norda urbeto de Israelo, situanta che la limo kun Libano. Tie trovighas la tiel nomata "bona barilo", kiu servas kiel trairejo al la "sekureca zono". Sekvos suprenveturo al Golana Altebenajho, tra pitoreska regiono, kun haltoj che la fontoj de Banjas, kaj la vulkana lago Birket Ram. Daùrigo ghis observejo, de kie videblas la siria urbo Kunejtra, kaj sekve al nova israela urbo Kacrin fondita en la jaro 1977. Veturo al Bejt Shan, urbo kun romiaj restajhoj, kaj laùlonge de Jordano, tra Jeriko, al Betanio kie Jesuo mirakle relevis Lazaron, la fraton de Maria. Preterpasinte Jerusalemon, vi veturos al Tel-Avivo. Fino de la vojagho.
Inkluzivita: dutaga ekskursado kun profesia chicherono kaj esperantlingva interpretisto, tranokto en kibuco (kun israela matenmangho kaj vespermangho), kaj chiuj enirbiletoj menciitaj en la itineroj.
Ne inkluzivita: lunchoj, trinkajhoj, personaj elspezoj kaj trinkmonoj. N.B. Vershajne necesas ke vi mendu kroma(j)n tranokto(j)n en Tel-Avivo (aù Jerusalemo), depende de via vojaghplano.
Prezoj. Loko en: unulita chambro 185 EUR: dulita chambro 156 EUR.

Dumkongresaj ekskursoj

Tuttagaj ekskursoj

Chiuj tuttagaj ekskursoj okazas sabaton, la 29-an de julio. La prezo chi-jare NE inkluzivas tagmanghon, sed estas antaùvidita paùzo dum kiu chiu povos lunchi laù propra prefero, gusto kaj bugheto. Kompense, la prezoj de la ekskursoj restas tre malaltaj. Chiuj aùtobusoj estas klimatizitaj, kaj chiun ekskurson akompanas profesia chicherono kaj esperantlingva interpretisto. Kun la kongresaj dokumentoj, che la aligho chiuj mendintoj ricevos koverton kun la menditaj kongresaj biletoj. Sur la biletoj estos bazaj informoj pri la ekskurso (dato, horo, buso), kiuj eventuale povos malsami ol tiuj presitaj en la Dua Bulteno. Kaze de malsameco validas la informoj sur la biletoj. Ne forgesu preni shirmilojn kontraù suno kaj varmo! Bv. noti ke la tereno en kelkaj ekskursoj povas esti netaùga por homoj kun marshhandikapoj. La priskriboj de la ekskursoj, kutime mencias tion.

E1 - Masada kaj la Morta Maro

Prezo: 59 EUR

Post unuhora veturado vi preterpasos Jerusalemon kaj direktighos malsupren al la Morta Maro. Rimarkinda estos la punkto je la alteco de la marnivelo, de kie la veturado kvazaù daùros "sub la maro". Tuj poste vi atingos la Mortan Maron trovighonte je la (mal)alteco de 411 metroj sub la marnivelo, la plej malalta punkto sur la Tero. Sekvos la kavernoj apud la antikva urbo Kumrano, kie en la jaro 1947 beduena pashtisto malkovris hazarde la Skrib-rulajhojn de la Morta Maro. Veturante laù la marbordo vi atingos la kulminon de la ekskurso, - la fortikajhon Masada, kiu trovighas sur nesurgrimpebla monto kun krutaj deklivoj. La fortikajho Masada estis la lasta juda bastiono kiu kontraùstaris la romianojn post la detruo de la Dua Templo kaj Jerusalemo (jaro 70 p.K.). La romianoj post longa siegho sukcesis surgrimpi kaj konkeri la fortikajhon nur dank’ al genia ideo konstrui ramplon el tero ghis la supro. Tiam okazis unu el la plej dramaj epizodoj en la juda historio, kiam la 960 sieghitoj decidis mortigi sin anstataù sklavighi. Vi supreniros la monton per telfero kaj vizitos la fortikajhon kun ties konstruajhoj. Sur la vojo reen, vi povos ghui la varmajn fontojn en Ein Gedi kaj naghi (flosi) en la sala akvo de la maro.

E2 - Malnova Jerusalemo - Sankta urbo por judoj, kristanoj kaj islamanoj

Prezo: 46 EUR

Post la alveno al Jerusalemo vi rekte veturos al la Monto Oliva, kie aperos antaù vi unika panoramo de la Malnova Urbo chirkaùata de muregoj, kun la Templo-Monto kaj la moskeoj Omar kaj El-Aksa. Sekvos vizitoj al lokoj ligitaj kun la vivo de Jesuo, do: la preghejo Patro Nia, kie Jesuo instruis al siaj dischiploj la preghon Patro Nia, kaj aùguris la detruon de Jerusalemo. Esperantlingva tabulo kun la fama pregho, inter 60 aliaj tabuloj diverslingvaj, videblas en la preghejo; la Kapelo de la Chieliro, kie Jesuo ascendis al la chielo; la preghejo Getsemane kun sia ghardeno de olivarboj, kie Jesuo estis perfidita kaj arestita; la Vojo de Doloroj (Via Dolorosa) kiun Jesuo, mortkondamnita, laùiris portante la krucon; la Preghejo de la Sankta Sepultejo, kie Jesuo estis entombigita: la plej sankta loko por kristanoj. Sekvos promenado tra la stratetoj de la urbo ghis la Okcidenta Murego (Murego de Lamentoj), la lasta relikvo de la Dua Templo, detruita de romianoj – la plej sankta loko por judoj. Eblos viziti la Templo-Monton kun la moskeoj Omar kaj El-Aksa, la tria plej sankta loko por islamanoj post Meka kaj Medina. Sekvos promenado tra la rekonstruita malnova juda kvartalo, post kio vi forlasos la malnovan urbon tra la Cion-pordego. La lastaj vizitotaj lokoj estos: la preghejo Dormition, kie Maria mortis (endormighis), la ejo kie Jesuo kaj liaj dischiploj manghis la "Lastan Vespermanghon", kaj la tombo de regho David.

E3 - Okcidenta Jerusalemo - la nova urbo, kaj Bejt-Lehem (Betlehemo)

Prezo: 45 EUR

Post unuhora veturado preskaù enirante Jerusalemon, vi atingos la vilaghon Ejn Kerem, la naskighlokon de Johano la Baptisto. Vi vizitos la preghejon "Sankta Johano la Baptisto", en kies korto trovighas tabulo kun esperantlingva pregho (Benedictus). Forlasinte la vilaghon vi atingos la sinagogon de la medicina centrejo Hadasa, kun la mondfamaj vitraloj de Mark Shagal (Marc Chagall). Temas pri dek du vitraloj reprezentantaj la dek du tribojn de Israelo. Sekvos la vizito al la memorigejo Jad Vashem, dedichita al la ses milionoj da judoj pereigitaj dum la dua mondmilito, viktimoj de la Holokaùsto (Genocido). De tie vi veturos al Kneset, la sidejo de la Israela Parlamento. La sekva vizitpunkto estos la "Sanktejo de la libro", parto de la Israela Muzeo kie estas eksponitaj la famaj "Skrib-rulajhoj de la Morta Maro", antikvaj hebreaj skribajhoj el la unua jarcento antaù Kristo, malkovritaj hazarde en 1947 de beduena pashtisto en kavernoj en Kumrano, apud la Morta Maro. Posttagmeze vi veturos al la naskighurbo de Jesuo, Bejt-Lehem, por viziti la "Preghejon de la Naskigho".

E4 - Nazareto, Tiberiado kaj Tiberiada Lago (Galilea Maro)

Prezo: 49 EUR

Tiu chi ekskurso donos al vi okazon viziti la plej sanktajn lokojn por kristanoj en Nazareto kaj chirkaù Tiberiada Lago, do lokojn ligitajn kun la vivo kaj agado de Jesuo. Nazareto, via unua halto, estas la urbo al kiu Dio sendis la anghelon Gabrielo por anonci al Maria: "kaj jen vi gravedighos en via ventro kaj naskos filon, kaj vi nomos lin JESUO" (La Anunciacio). En Nazareto Jesuo pasigis sian infanaghon, kaj laboris kiel charpentisto. Vi vizitos la preghejon de la Anunciacio, unu el la plej belaj en la mondo, kaj la Puton de Maria. Survoje al Tiberiado vi vizitos la vilaghon Kana, kie okazis la unua miraklo de Jesuo, kiam dum geedzigha festo li faris vinon el akvo. Sekvas Tiberiado mem, kie post mallonga vizito en la urbo vi boatveturos sur la Tiberiada Lago. Tuj poste vi atingos Kapernaùmon, kie estis la agadcentro de Jesuo. Tie trovighas restajhoj de antikva sinagogo el la periodo de la Dua Templo, kie Jesuo instruis siajn dischiplojn. Ne malproksime de Kapernaùmo trovighas Tabba, alia loko kie Jesuo faris miraklon kaj satigante 5000 homojn per kvin panoj kaj du fishoj. Tie viziteblas belega mozaiko kiu priskribas la miraklon. Je la fino vi vizitos Jardenit, loko kie oni faras baptajn ceremoniojn en la rivero Jordano.

E5 - Cezareo, Hajfa, Akko kaj kavernoj Rosh ha-Nikra (la norda marborda vojo)

Prezo: 48 EUR

Unue vi atingos la antikvan urbon Cezareo, konstruitan de Herodo la Granda en la jaro 20 a.K. Siatempe ghi estis la plej impona havenurbo, kaj dum 500 jaroj ghi estis la chefurbo de la romia provinco Palestino. Post tiu periodo la urbo estis konkerita de muzulmanoj, kaj ilin sekvis la kruckavaliroj. Vi vidos grandegan amfiteatron kaj inghenian akvedukton el la romia periodo, muregon kaj remparon el la kruckavalira periodo.
Alveninte al Hajfo vi atingos la supron de la monto Karmel, kie aperos antaù vi neforgesebla panoramo kun la haveno, la urbo, kaj la Bahaa Centro kun ghiaj pendantaj ghardenoj. Sekvos la vizito de la Bahaa Centro kun ghiaj konstruajhoj, unuavice la tombeja monumento de Bab, la profeto kaj heroldo de la bahaa religio. Veturo norden al Akko, antikva urbo menciita jam en la Malnova Testamento. Akko atingis sian apogeon dum la periodo de la kruckavaliroj, kiam ghi ighis la chefurbo de la regno. En la jaro 1799 Napoleono sieghis la urbon sensukcese. El la kruckavalira periodo videblas la Haloj de la Kavaliroj kun 300 metrojn longa tunelo (sekreta elirejo al la haveno). El la turka periodo videblas la fortikajho kun la remparo, kaj la moskeo Al Ghazar, laù iuj la plej bela en Israelo. Norde de Akko che la libana limo vi vizitos interesajn naturajn kavernojn, fositajn de la enpenetranta maro.

E6 - Kavernoj de Bejt-Ghuvrin kaj la termofontoj Hamej Joab

Prezo: 44 EUR

Veturo tra la Lando de Davido kaj Goljato al Bejt-Ghuvrin kun ghiaj nekredeblaj kavernoj, manfositaj en la kalkshtonaro. Tie staris en la antikveco la urboj Maresha kaj Bejt-Ghuvrin. Laù la Malnova Testamento, Maresha ekzistis jam en la naùa jarcento a.K. Dum la kvara jarcento a.K., la helena loghantaro konstruis la malsupran urbon, kaj fosis la kavernojn sub ghiaj domoj. La kavernoj estis uzataj kiel akvujoj, kolumbarioj, olivpremejoj kaj magazenoj. El chiu domo, shtuparo fosita en la shtono, kondukis malsupren al la kavernoj. Vi vizitos unue la Kolumbarion, kiu entenas 2000 nichojn. La Kolumbario ne estis, kiel kutime, nekropolo por la cindro de la mortintoj, sed bredejo de kolomboj uzitaj por kultaj ceremonioj kaj nutrado. Impresas la olivpremejo kun sia inghenia preparprocedo de olivoleo. Vi daùrigos al la helenaj domoj, sub kiuj trovighas tuta komplekso de cisternoj, kiuj atendas vian viziton. La vagado tra tiuj kavernoj estas unika travivajho. Post duhora piediro vi veturos al komplekso de kloshformaj kavernoj. Temas pri dekoj da kavernoj ligitaj inter si. Malgraù la antaùa hipotezo, laù kiu la kavernoj estis uzitaj kiel akvujoj, evidentighis ke ili estis shtonminejoj kiuj provizis konstrumaterialon por la konstruado de la marbordaj urboj kaj Bejt-Ghuvrin mem. Post tiu kelkhora vizito, iom pena, vi veturos por ripozi en la banloko Hamej Joab, kie vi povos ghui varmajn mineralfontojn.

Duontagaj ekskursoj

D1 - Enkonduko al la urbo Tel-Avivo

Prezo: 28 EUR

Tel-Avivo, la plej moderna urbo de Israelo, hejmo de komerco, kulturo kaj distro, urbo vigla tage kaj nokte, prave meritas sian alnomon "La senhalta urbo". Celo de tiu chi ekskurso estas konatigho kun la chefaj vidindajhoj de la moderna parto de la urbo kaj kun la antikva urbo Jafo, do: Openheimer diamanto-centro kun la muzeo, Rabin-placo kun la monumento dedichita al la memoro de la israela chefministro Ichak Rabin, murdita tie en novembro 1995; Bulvardo Rotchild kun sia aùtentika arkitekturo el la tridekaj jaroj, Shalom - turo kun sia observejo, kaj fine la antikva Jafo, havenurbo jam antaù 4000 jaroj, kun siaj arkeologiaj elfosajhoj, antikva haveno, kaj artista kvartalo kun galerioj kaj restoracioj.

D2 - Krozo sur la Mediteranea Maro (kun vespermangho)

Prezo: 49 EUR

Tiu chi krozo per la promenshipo Sababa 5 ofertas al vi eksterordinaran trihoran travivajhon dumvespere sur la maro, laùlonge de la Tel-Aviva marbordo. Vi enshipighos en la malnova haveno Jafo kaj ekiros iom antaù la sunsubiro. De sur la ferdeko vi spektos apartan belegan sunsubiron en la maro, kaj post la noktigho vi povos admiri unikan perspektivon de la lumigita Tel-Aviva marbordo kun ghiaj promenejo kaj hoteloj. Iom poste vi ghuos abundan vespermanghon kun vintrinkado kaj ech atendos vin ... eta surprizo! Sataj kaj plenaj je travivajhoj vi revenos al la haveno Jafo kaj fine al la Kongresejo.

D3 - Krozo sur Mediteranea Maro (sen vespermangho)

Prezo: 39 EUR

Same kiel D2 (vidu supre), nur sen la vespermangho. Refreshigaj trinkajhoj estos mendeblaj surshipe. Muziko kaj dancado vigligos la etoson kaj ankaù vin atendos ... la eta surprizo de la ekskurso! Plenaj je travivajhoj vi revenos al la haveno de Jafo kaj fine al la Kongresejo.

D4 - Stalaktita groto Sorek kaj vilagho Ejn Karem

Prezo: 35 EUR

Post unuhora veturado orienten, preskaù enirante Jerusalemon, vi atingos la pitoreskan vilaghon Ejn Karem, chirkaùitan de olivarboj kaj vinberejoj. Laù la kristana tradicio en Ejn Karem naskighis Johano la Baptisto. Tie ankaù Maria vizitis sian kuzinon Elizabetan, la patrinon de Johano. Vi vizitos la preghejon "Sankta Johano la Baptisto", konstruitan sur la groto kie naskighis Johano. En ties korto trovighas tabulo kun esperantlingva pregho (Benedictus). De Ejn Karem vi daùrigos la vojaghon tra pitoreska regiono kaj post 20 kilometroj atingos la groton Sorek. Temas pri stalaktita groto vivanta kaj evoluanta, hazarde malkovrita antaù 30 jaroj, - la plej bela en Israelo. Post la enkonduka prelego, dum unuhora promenado vi admiros la belegajn stalaktitojn kaj stalagmitojn kun interesaj priskriboj donitaj de la loka chicherono. Entute belega ekskurso por naturamantoj.

D5 - La Bahaa Monda Centro en Hajfo kaj la pendantaj ghardenoj.

Prezo: 29 EUR

Tiu chi ekskurso portos vin al la komplekso de la Bahaa Monda Centro kun la pendantaj ghardenoj ofte nomataj "la oka mondmiraklo". Post unuhora veturado norden vi atingos la urbon Hajfo, kiu etendighas sur la deklivoj de la monto Karmelo. De sur la montosupro aperos antaù vi neforgesebla panoramo, kun la haveno, la urbo kaj, kompreneble, la Bahaa Centro mem kie, dank al rektaj kontaktoj kun la Esperanto-movado, bahaaj volontuloj konatigos al vi la esencon de la Bahaa Kredo kaj ghian historion. Sekvos la vizito de la chefaj konstruajhoj, do: la sepultejo de Bab, la profeto kaj heroldo de la bahaa religio; la sidejo de la Universala Domo de Justeco; - la leghdona aùtoritato de la bahaa kredo, kaj, fine, la arkivejo.

Ree al kovrilpagho