NASK 2001

Instruistoj

Grant GOODALL Edukado: Doktoro pri lingvistiko, Universitato de Kalifornio ĉe San-Diego; bakalaŭro (summa cum laude - kun plejaltaj honoroj) pri lingvistiko, Universitato de Kalifornio ĉe Los-Anĝeleso (UCLA); kromaj studoj ĉe MIT kaj la Nacia Universitato de Meksiko; Finis superajn studojn pri Esperanto sub William Auld ĉe San-Francisko Ŝtata Universitato (SFŜU). Profesia historio: Profesoro pri Lingvistiko, Universitato de Teksaso, El-Paso. Iama instruisto ankaŭ pri la hispana, la angla kiel dua lingvo, la Ĉina, kaj Esperanto. Fulbright Stipendiito ĉe Universitato de Genevro (Svislando), dumtempa profesoro ĉe Universitato de Comahue (Argentino), kaj invitita preleganto ĉe universitatoj sur kvin kontinentoj. Sperto pri Esperanto: Kelkfoje instruis en la somera kursaro ĉe SFŜU; tion estris en 1990 kaj 2000. Evoluigis aŭtodidaktajn Esperanto-kursojn por la Universitato de Kalifornio. Vic-prezidanto de Esperanto-Ligo por Norda Ameriko kaj iam dumtempa estro de ties Centran Oficejon. Partoprenis multajn Esperantajn renkontiĝojn en Usono kaj eksterlando, inkluzive kelkajn de TEJO. Publikigaĵoj: Verkis multnombrajn artikolojn kaj librojn pri lingvistiko. Duncan CHARTERS Edukado: Doktoro kaj magistro pri hispana lingvo kaj literaturo, Indiana Universitato; magistro kaj bakalaŭro pri modernaj kaj mezepokaj lingvoj, Kembriĝa Universitato (Britio). Profesia historio: Ekde 1974, profesoro ĉe Principia Colegio (Ilinojso), kie li kunordigas la studprogramojn pri la hispana lingvo kaj la rajtigo de mezlernejaj lingvoinstruistoj. Antaŭe instruis lingvojn, literaturon, kaj instrumetodojn ĉe i.a. Indiana Universitato kaj The Experiment in International Living. Sperto pri Esperanto: Aktivis en la Esperanto-movado en Britio, kie li redaktis la porjunulan gazeton Kial Ne? En 1970, gajnis la unuan premion pri oratoro ĉe la Universala Kongreso en Vieno. Helpis al William Auld en la fruaj jaroj de la SFŜU somera kursaro kaj poste kelkfoje instruis kaj estris tiun programon, plej lastatempe en 1994 kaj 1995. Estris ankaŭ la someran programon ĉe la Universitato de Portlando antaŭ la tiea UK en 1972. Prezidanto de ILEI, 1993–1998. Nuntempe prezidas la Internacian Ekzamenan Komisionon de ILEI/UEA. Derek ROFF Edukado kaj profesia historio: Bakalaŭro pri latinamerikaj studoj kaj modernaj lingvoj, Universitato de Nov-Meksiko (UNM). Studis pri novaj rimedojn, komputil-helpata kaj eksperimenta edukado ĉe MIT kaj la Nacia Lingvoakira Rimedocentro ĉe San-Diega Ŝtata Universitato. Kunfondinto de MITV studenta televidstacio. Stabano, UNM Computilaj kaj Informatikaj Rimedoj kaj Teknologio. Estrarano, Computer Aided Language Instruction Consortium (CALICO). Konsilanto al la Esperantic Studies Foundation. Fakestro pri evoluigo de aŭdaj, vidaj, multmediaj, kaj komputil-bazitaj materialoj por fremdlinva lernado, UNM Centro por Lingvolernado. Nuntempa fokuso inkluzivas digitan, vidbendan, kaj interaktivan kursovaron. Sperto pri Esperanto: Iama stabano, CO de UEA, Roterdamo. Partoprenis diversajn internaciajn Esperantajn renkontiĝojn, inkluzive de UK 1984, 1985, 1987; IJK 1985, 1987; kaj IS 1985. Studentis ĉe SFŜU dum 14 someroj sub diversaj instruistoj. Instruis ĉe SFŜU en 1996 kaj 1997. Ekde 1982 instruas Esperanton ĉe UNM kaj private en sia urbo. Kunlaboris en kelkaj projektoj pri interreta instruado de Esperanto kaj evoluigis diversajn lernilojn. Estrarano kaj vic-prezidinto, Esperanto-Ligo por Norda Ameriko.

Tiu ĉi kurso, por lernantoj postkomencaj kaj progresantaj, celas helpi al studentoj gajni memfidon pri efika kaj krea lingvouzo. Oni utiligos diversajn legaĵojn kaj la vidbendan kurson Esperanto: Pasporto al la tuta mondo por lanĉi esploradon de multaj aspektoj de konversacia kaj skriba Esperanto. Studentoj havos okazojn rolludi oftajn konversaciajn situaciojn, plibonigi siajn kapablojn legi kaj verki, kaj konatiĝi kun la hodiaŭa Esperanta kulturo. Kosto: USD295

Aŭd-vidaj metodoj por instrui kaj lerni Esperanton

La ĉijara supera kurso estos intensa staĝo pri aŭd-vidaj materialoj kaj metodoj rilate al Esperanto-instruado. Studentoj esploros teoriojn/konceptojn pri dualingva akirado kaj ties rilaton al modernaj instrumetodoj, pristudos larĝan gamon da materialoj disponeblaj por Esperanto kaj aliaj lingvoj, kaj kunlaboros en malgrandaj grupoj por plue adapti kaj evoluigi ilin. La kurso valoros por tiuj kiuj interesiĝas pri kiel oni povas instrui kaj lerni Esperanton, ĉu en klasĉambra aŭ kluba etoso, ĉu Interrete. Aktiva partoprenado necesos. Kosto: USD295