Historio de NASK

Catherine (Cathy) L. Schulze kaj sxia edzo William (Bill) H. Schulze konceptis la ideon en la 1960aj jaroj, komenci altnivelan oficialan programon por instrui Esperanton cxe San-Franciska Sxtata Universitato. Tiu cxi programo havis du cxefajn celojn: La trejnadon de instruistoj, kaj plibonigon de la lingvonivelo de usonaj Esperantistoj.

En 1970, post longa diskuto kaj persvado de la SFSxU-instancoj, la kursoj komencigxis kun du instruistoj, du niveloj de instruado, kaj 52 studantoj. Por komparo, cxe la kursoj en la jaro 2000, la lasta jaro de instruado cxe SFSxU, estis 66 studantoj en kvar niveloj kun tri instruistoj. Ekde la komenco de la kursaro, diversaj instruistoj kreis apartajn metodikajn kursojn por instruistoj.

Cathy Schulze ricevis altan lauxdon pro instigado kaj dauxrigado de la kursoj, ecx de la tiama Urbestro de San-Francisko, Frank Jordan, kiu subskribis oficialan proklamon en 1994, lauxdante la longajn strebojn de Cathy tiucele, kun mencio ke la kursoj kontribuis multe al edukado gxenerale kaj kiel modelo de altkvalita fremdlingva instruado. Mayor Jordan tiam nomis 27 julion, 1994, la "Tago de Internacia Amikeco en San-Francisko."

Dum la jaroj de la kursoj ekde 1970, pli ol 1,800 studantoj el cxiuj kontinentoj spertis la gvidadon de vere internacia grupo de eminentaj Esperantistoj. (Listo de tiuj instruistoj, multaj el kiuj instruis dum kelkaj jaroj, estas videbla en la 'Instruaro' sekcio de cxi tiu retpagxaro.)

La tri-semajna studado cxe NASK inkluzivas ne nur lecionan laboron. Vespere kaj semajnfine, distraj kaj instruaj aferoj okazas, inkluzive prelegojn, kantadon, dancadon, konversaciajn cirklojn, piknikojn kaj ekskursojn en la regiono. Grava parto de cxi tiuj kursoj cxiun jaron estas la amikeco kaj inspiro kiuj ricxigas la vivojn de la partoprenantoj.

Kvar edukaj fondusoj de la Esperanto-Ligo por Nordameriko (ELNA), kelkaj individuoj, kaj diversaj kluboj kaj organizajxoj donacis financan subtenon al merithavaj studantoj. Grupo nomita "Esperanto Past-students of San Francisco" (en Esperanto ESSF, "Esperantaj Studintoj de San-Francisko") ne nur kontribuis financan subtenon por stipendioj, sed ankaux por la kosto de la cxiutagaj bultenoj kaj por diversaj aliaj aferoj kiuj glatigas la funkciadon de la klasoj.

Ekde 2001, cxar SFSxU adoptis sistemon de tutjara instruado, NASK translokigxis: en 2001 gxi okazis cxe la Universitato de San Francisko, kaj de 2002 gxis 2006 cxe la monde konata kaj respektata School for International Training (La Altlernejo por Internacia Trejnado) en Brattleboro, Vermonto. En 2007, Esperanto estis aldonita al la someraj lingvaj programoj cxe la Universitato de Kalifornio, San Diego. NASK translokigxis reen al la okcidenta marbordo.

De post la morto de Cathy Schulze en 1999, the Esperantic Studies Foundation (ESF), kiu estas respondeca por la Schulze-heredajxo, igxis la cxefa subtenanto de NASK. ESF finance subtenas la postenon de administranto, gvidas la elekton de instruistoj, donas stipendiojn kaj garantias la lernejon kontraux monperdo. Tiu arangxo ebligas la dauxrigon de la misio de Cathy Schulze nuntempe kaj estontece.

Dum la jaroj ekde 1970, la esperoj de Cathy kaj Bill Schulze realigxis. La celoj trejni instruistojn kaj plibonigi la lingvonivelon de usonaj Esperantistoj estas cxiujare atingitaj. La estonteco promesas nur kreskon kaj plibonigon por Esperanto kaj por NASK.

[Redaktita el HARMON, Bill: A HISTORY OF THE ESPERANTO LEAGUE FOR NORTH AMERICA, INC. (2002: Esperanto League for North America, P.O. Box 1129, El Cerrito, CA, USA 94530 www.esperanto-usa.org )]