Invititaj Gastoj

Ĉeestantoj de la ĉijara kongreso bonŝancas, ĉar ni invitis du famajn Esperanto-muzikistojn el Eŭropo koncerti la vendredan kaj sabatan noktojn! Sed la amuziĝo ne limias al tio. La muzikistoj partoprenos la kongreson ankaŭ ekster la scenejo, dum la tagoj dividante kun ni siajn amuzemajn karakterojn kaj dum la noktoj kunfestante kun ni per muziko kaj dancado post la kutimaj kongresaj programoj.

Ankaŭ bonŝanciga estas la ĉeesto de Humphrey Tonkin, pasinta prezidanto de UEA (la Universala Esperanto-Asocio) kiu donos la ĉefprelegon ĉe la kongresa malfermo. Krom la pasinta prezidanto kaj nuna vic-prezidanto de UEA, Tonkin estas ankaŭ estrarano de ESF (Esperantic Studies Foundation) kaj de World Learning, kiu estras la Lernejo por Internacia Trejnado kie okazos la Esperanto-kursaro NASK ĉi-jare. Tonkin estas ankaŭ fama redaktisto kaj tradukisto en Esperantio. Lastatempe aperis lia anglalingva traduko de Maskerado, membiografia rakonto de Tivadar Soros (patro de la fama merkisto kaj filantropo George Soros).

JoMo (Jean-Marc Leclerc) komencis muziki en la jaro 1977 kaj esperantiĝi en 1988. Tute nature li do decidis kanti kaj verki en la lingvo internacia. Li surpiedigis sian propran grupon, La Rozmariaj Beboj, kiu konatiĝis komence de la jaroj 90 en la franca alternativa rok-medio. La grupo turneis en diversaj landoj (en kiuj Ĉinio) kaj produktis du albumojn. Post disiĝo de La Beboj, JoMo kreis novan grupon, Liberecanoj, kun kiu li surbendigis sep-titolan liberecaneman albumon kaj kreis la unuan rekordon de multlingva koncerto (22 kanzonoj en 22 lingvoj), kiu aperis en 2000 en la libro Guinness. En 2001, li sole surbendigis tutan Esperantan albumon titole JoMo friponas, kiu kaptas la pli personan kaj folkan stilon de liaj solaj koncertoj ĉe Esperanto-festivaloj tra Eŭropo. Flanke de muziko, li projektas eldoni konversaci-libron pri la gaskona lingvo kaj vortaron pri rugbeo. Krom tio, li havas polan edzinon, sepjaran filinon (kiu jam komencis surscenejiĝi por kanti en la pola), ne fumas, ne trinkas alkoholon, ne manĝas viandon sed havas unu malvirton: li multe parolas.

Kimo (Kim Henriksen) muzikumis kaj amuzis ekde juna aĝo. Je la aĝo de 2-jaroj, li falis el fenestro de dua etaĝo. Nenio rompiĝis, tamen eble tio influis lian frenezecon surscenejan (kaj eksterscenejan!). Kiel denaska Esperanto-parolanto, li ĉeestis multajn junularajn renkontiĝojn, ĉe kiu li renkontis aliajn junajn Esperanto-muzikistojn kaj el tiuj renkontoj estiĝis Amplifiki, unu el la plej famaj Esperantaj rokgrupoj. En tiuj fruaj jaroj, Kimo verkis la kanton "Sola," kiu nun estas nepra kutimaĵo ĉe junularaj renkontiĝoj en Eŭropo. Kimo estis prezidanto de la Esperanto Junulara Dana Organizo, prezidanto de la Dana Esperanto Asocio, kaj kunaranĝis kelkajn KEF-ojn (Kultura Esperanto-Festivalo) inkluzive de la venonta en Svedio ĉi-somere. Li nun koncertas kun la dana-bosna-pola muzikgrupo Esperanto Desperado, kies disko broKANTAĴOJ enhavas kelkajn refaritajn kantojn de Amplifiki.

Viziti la TTT-ejon de Esperanto Desperado http://www.esperanto.dk/desperado/

Elŝuti senpagan muzikon de JoMo ĉe Music Express http://www.musicexpress.com.br/jomo

Elŝuti senpagan muzikon de Esperanto Desperado ĉe Music Express http://www.musicexpress.com.br/espodespo

Kompakt-diskojn de JoMo kaj de Esperanto Desperado aĉeteblas per la libro-servo de ELNA.